KALIBO,Aklan—Nagapangatubang sa kasong human trafficking ro sangka 29 anyos nga eaeaki matapos nga gina-alegar nga ginabugaw kara ro tatlong kababayin-an sa sangka hotel sa Rizal St. Barangay Poblacion, Kalibo.
Suno kay P/Lt. Col. Belshazzar Villanoche, hepe it Kalibo Municipal Police Station nga naaresto ro suspek nga nakilaea kay Ruel Fuentes ag residente it Sta. Elena, New Buswang, Kalibo sa ginpatigayon nga entrapment operation sa nasambit nga lugar ko Lunes it hapon.
Naeowas man it kapulisan ro tatlong kababayin-an nga naga-edad it 20, 21 ag 24 nga ginasugid nga ginabugaw ni Fuentes.
Gindugang pa ni Villanoche nga nakabaton sanda it impormasyon nga ‘ginabaligya’ it suspek ro mga biktima rason nga ginkasa ro entrapment operation
Gamit ro P4,500 pesos nga marked money, nagpakuno-kuno ro sangka police asset nga sangka customer nga naga-usoy it hingalit nga kalipay.
At kat batunon ni Fuentes ro marked money para sa tatlong babaye nga anang ginabugaw, insigidang ginposasan it mga operatiba ro suspek.
Aminado ro suspek nga nagsueod sa iligal nga aktibidad bangud sa kalisod it pagpangabuhi daea it covid 19 pandemic.
