KALIBO, Aklan—Padayon nga ginbueong sa Aklan provincial hospital ro sangka eaeaki matapos nga ginbuno it kaugalingon nga tiyo sa Brgy. Lupo, Altavas.
Ginkilaea ro biktima nga si Michael Patricio, 29-anyos samtang ro suspek nga ana mismong tiyo hay nakilaea kay Joel Patricio, 60-anyos ag parehong residente it nasambit nga lugar.
Base sa inisyal nga imbestigasyon it Altavas PNP, nagsueonlugan ro daywa samtang naga-inuman sa baeay mismo ni Joel kon sa siin kat una eon sa impluwensya it aeak hay nagkapikunan hasta nga nabun-an ro biktima.
Ginasugid nga sanduko ro ginamit it suspek sa pagbuno sa tiyan it biktima.
Insigida man raya nga gindaea sa Altavas district hospital ag matapos nga gin-eapatan it paunang medikasyon hay gilayon man nga ginrefer sa Aklan provincial hospital kon sa siin imaw sa makaron naka-confine para sa nagakaigong pagbueong.
Samtang, ro nasambit nga suspek hay presenteng una sa paghinakop it pulisya para sa nagakaigong disposisyon.
