KALIBO, Aklan — Arestado ro sangka 29 anyos nga eaeaki matapos maboe-an it baril sa Sitio Caeog-a, Brgy. Cabugao, Batan, Aklan.
Nakilaea ro suspek nga si John Rey Magbiro, residente it nasambit nga lugar.
Suno kay P/Staff Sgt. Laus it Batan Police Station, naaresto ro suspek sa andang baeay matapos imaw nga sirbihan it search warrant bangud sa pag-eabag sa Republic Act No. 10591 ukon Comprehensive Firearms and Ammunition Regulation Act.
Nagresulta ro operasyon sa pagkakumpiska it sangka kalibre .38 nga baril ag mga bala nga nakatago sa sueod it anang aparador.
Si Magbiro hay gina-alegar nga ginreklamo it mga pumueuyo bangud sa pagpina-eupok it baril kada mahilong ag gintutukan it baril ro andang chief tanod ko nagtaliwan nga kapiyestahan.
Ginpahayag dugang nga makapilang beses eon raya nga ginpatawag sa barangay apang owa nagasipot rason nga ginduso ro operasyon.
Una eon sa kustodiya it Batan PNP si Magbiro para sa nagakaigo nga disposisyon.
