2nd batch it land acquisition and distribution sa Aklan, uwa pa it gintaeana nga schedule

KALIBO, Aklan—Indi pa sigon matumod it Department of Agrarian Reform kung hin-uno mapatigayun ro 2^nd batch it land acquisition and distribution sa probinsya it Aklan.

Suno kay Chief Agrarian Reform Officer Joselito Inguin it DAR-Aklan nga ginahueat pa nanda ro resulta it soil sample nga ginbuoe it Department of Agriculture (DA) Central Office.

Dapat sigon nga masigurado nga pwedeng maproduktuhan ro igapanupod nga eugta.

Engkaso suno kana nga magguwa eon ro resulta ag makapasar raya sa kwalipikasyon hay igaturn-over raya it DA sa Department of Environment and Natural Resources (DENR) antes itugyan sa DAR para sa pagpadayun it 2^nd batch it land distribution.

12 ka mga lote sigon sa bahin it Brgy. Manoc-manoc ag Balabag sa isla it Boracay ro sarang maipanupod sa mga benipisyaryo nga may kaeaparon nga 16.5 hectares.

Sa inisyal nga validation nagaguwa nga sambilog sa 12 nga lote hay built up area rason nga indi raya pwedeng i-reporma.

Sa makaron hay nagapadayun pa ro validation ag pagpaidaeom sa procedure it mga nasambit nga eugta.

Samtang, ro mga kwalipikasyon para maka-avail kara hay dapat owa it ginapanag-iyahan nga eugta, farmer teller, actually occupant ag occupant of public lands ro sangka benipisyaryo.

Madumduman nga kaibahan sa 1^st batch it programa ro pilang ka mga recipient it Boracay Ati Tribal Organization (BATO) ag Boracay Tumandok Agrarian Reform Beneficiaries Association kung siin natigayun eon nga maipanupod sa mga raya ro land holdings ag titueo it eugta.