NATIONAL News — Kapin sa 3.1 milyong pamilyang Pilipino ro nakaexperiensiya it owa ginahungod nga pagkagutom ukon involuntary hunger it maskin sang beses eang sa unang quarter it 2022, suno sa pinaka-ulihing survey it Social Weather Stations (SWS) nga ginpaguwa ko Lunes.
Gintumod it SWS ro involuntary hunger bilang “paggutom ag owa it makaon.”
Nasayuran sa survey nga nagtaas sa 12.2% ro hunger rate it nasyon halin sa 11.8% ko Disyembre it nagtaliwan nga dag-on.
Nagtaas it 2.5 puntos ro insidente it gutom sa Balance Luzon halin sa 9.2% ukon ginaboeobanta nga sang milyong pamilya, hasta 11.7% ukon 1.3 milyon ko rato nga tiempo.
Mas abu pa nga mga pamilya sa Mindanao ro naga-antus sa kawad-an it bastante nga pagkaon, nga nag-abot sa 761,000 pamilya halin sa 703,000.
Sa pihak kara, nagnaba ro lebel it kagueutmon it 4.2 puntos sa Metro Manila halin sa 22.8% ukon 770,000 ko fourth quarter it 2021, naging 18.6% ukon 636,000 ko Enero hasta Marso.
Mas manaba man ro nailista sa Visayas halin sa 462,000 pamilya hasta 373,000 pamilya.
Ginpatigayon ro survey ko Abril 19-27 gamit ro face-to-face interviews sa 1,440 adults sa bilog nga nasyon.
