KALIBO, Aklan — Nagdeklara eon it state of calamity ro mga lokal nga gobyerno it tatlong banwa sa Aklan matapos bahaon sa pagpanaeasa it bagyong Urduja.
Magkaseparar nga nagdeklara it state of calamity ro Buruanga, Nabas ag Malay nga imaw ro may hurisdiksyon sa isla it Boracay agud magamit ro nakataeanang pondo para sa rehabilitasyon ag mga naapektuhan it grabe nga pag inuean nga naging rason it maeapnagon nga pagbaha.
Suno kay Provincial Disaster Risk Reduction and Management Council (PDRRMC) action officer Galo Ibardolasa ro tatlong banwa ro pinakagrabeng naapektuhan it bagyo kun siin sa banwa it Buruanga hay naga abot sa leog ro pagbaha.
Makarondaya man ro sitwasyon sa banwa it Malay ag Boracay nga naga abot hasta sa hawak ro tubi-baha.
Nakaangkon man it landslide sa banwa it Nabas dahilan it pagka-stranded it mga pasahero ag turista paagto sa Boracay.
Naga abot man sa ginatos katawo ro gin evacuate sa mga evacuation centers sa nasambitang mga banwa.
