KALIBO, Aklan — Ginaeauman it mga pumueuyu sa unang distrito it probinsiya it Aklan ro pag-atubang it tatlong kandidato sa pagka-kongresista sa maabot nga 2025 midterm elections .
Raya hay kasunod it pagtapos it termino ni Congressman Carlito Marquez .
Suno kay Banga Sangguniang Bayan Member Jocel Rata nga matunog ro pangaean makaron ni Jess Marquez nga magabueos sa pwesto it anang ama kun sa siin posible nana nga maka engkwentru sanday dating Batan Mayor Rodel Ramos ag Kalibo Mayor Juris Sucro .
Nakadepende eon lang sigon makaron sa political structure nga igatukod it sangka kandidato ro andang pag madinaeag-on.
Samtang, ginapanan-aw nana nga medyu maging mabudlay para sa ka-tandem ni Governor Joen Miraflores ro pagpangampanya bangud nga hasta sa makaron hay blangko pa ro kaabuan kon sin-o ro magabangga kana.
Nakadepende eon lang sigon raya kon sin-o ro magadaea kana nga kaapin nga magapadaeagan bilang kongresista sa first district.
Sa pihak nga parte, imposible suno kay Rata nga magpadaeagan bilang gobernador si Aklan 2nd District Congressman Ted Haresco.
Pagatapuson sigon kara ro anang termino eabi pa ag mabahoe ro pagsalig kana nanday Presidente Ferdinand Marcos Jr., ag House Speaker Martin Romualdez.
Mabahoe sigon imaw nga asset ag ginakabig makaron nga icon of national government bilang Vice Chairman it Committee on Appropriations.
Owa pa sigon it nakikita nga maging kaengkwentru kara sa eleksyon .
Nasayuran nga ro filing it certificate of candidacy hay sa maabot nga Oktubre 1 hasta 8.
