Nagpaguwa ro Philippine National Police (PNP) it tatlong freedom parks sa Manila para sa mga raliyista nga nagaplanong magpatigayon it protesta sa adlaw it inagurasyon ni President-elect Ferdinand Marcos Jr.
Suno kay PNP director for Operations Police Maj. Gen. Valeriano De Leon nga pagapasugtan ro mga protester nga magtieipun-tipon ag magpahayag it andang mga reklamo bilang pagrespeto sa andang kinamatarong sa mga gintaeana nga freedom parks sa Liwasang Bonifacio, Plaza Dilao ag Plaza Miranda.
Dugang pa ni De Leon, sa mga nasambit eamang nga lugar puwedi magpatigayon it mga programa ro mga raliyista nga owa it permit maghalin sa local government units.
Apang pagklaro man ni De Leon nga may pilang limitasyon nga kinahangean sundon it mga raya partikular eon kung ro aktibidad hay magatuga it inconvenience ag maka-apekto sa peace and order it inagurasyon.
Samtang, nauna eon kara ro pilang mga grupo ag indibidwal ro nagaplano nga magapatigayon it protesta sa tunga it mga isyu kontra sa Marcoses.
