KALIBO, Aklan—Sigurado eon ro kadaeag-an it tatlong alkalde sa probinsiya it Aklan para sa eleksyon sa masunod nga dag-on.
Raya hay matapos nga owa it sin-o man nga nakaangkon it kabaskog it buot nga kandidato nga mag-engkwentru sa reelection bid ni Balete mayor Dexter Mationg Calizo it Partido Demokratiko Pilipino Lakas ng Bayan ukon PDP-Laban
Mag-eowas kay Calizo, owa man it maka engkwentru sanday Altavas incumbent vice mayor Denny Refol, Sr. it Nationalist People’s Coalition nga magabalik sa pagka-alkalde ag Sangguniang Panlalawigan member Jose Miguel Martin Miraflores it PDP-Laban nga magapadaeagan bilang mayor it Ibajay.
Unopposed man ukon owa it kontra sa andang pagpadaeagan bilang vice mayor sanday incumbent vice mayors, Wilbert Ariel Igoy it Nacionalista Party it Malinao; George Villarubia it Nacionalista Party it Lezo ag Patrick Lachica it Nationalist People’s Coalition sa Balete.
Ro nasambit nga mga kandidato nga owa it makabangga sa eleksyon hay puro miyembro it tibyog-akean.
Sa pihak nga parte, 330 ro nagdihon it certificate of candidacy para sa 136 nga pwesto sa Sangguniang Bayan sa 17 nga banwa sa Aklan.
Mayoriya kara hay mga eaeaki matapos nga 69 ukon 21 porsiyento eamang it nasambit nga numero ro mga babaye.
Samtang, 48 sa mga raya hay independent candidates.
Nasayuran ro banwa it libacao ro may pinakamaabu nga kandidato sa pagka-SB member nga nag abot sa 28 nga ginsundan it batan nga may 27 nga kandidato.
Waeo sa mga kandidato it pagka konsehal sa balete ro sigurado eon it andang kadaeag-an matapos nga owa ro mga raya it kontra.
