KALIBO, Aklan—Ginkumpirma ni Punong Barangay Roseller Nalayog it Brgy. Tabayon, Banga nga tatlo sa andang kasimaryo ro nagpositibo sa Coronavirus Disease 2019 ukon COVID-19.

 

Suno kana, umpisa ko adlaw it Huwebes, Oktobre 15 hay ginpaidaeom nanda sa surgical lockdown ro compound it mga nagpositibo.

 

Raya nga tikang hay para malimitahan ro pagkalhit it virus.

 

Samtang, presente mat-a nga naka-facility quarantine ro mga nasambitang COVID-19 patient.

 

Kaangot kara, nakalista sigon sanda it 13 ka mga high risk contacts it mga pasyente kung sa siin ginbue-an eon ro mga raya it swab specimen sample.

 

Sa pihak kara, nagapadayun gihapon ro andang pagpatigayun it contact tracing agud matumod ro tanan nga nakasalamuha it mga pasyente.

 

Engkaso sigon nga magnegatibo sa deadly virus ro mga raya hay igapadayun pa gihapon nanda ro andang monitoring sa sueod it 14 diyas.

 

Sa makarun hay nagapabilin nga asymptomatic ukon owa nagapakita it anumang sintomas it sakit ro mga nasambit nga indibidwal.

 

Samtang, nag-apela man it kooperasyon ag pag-intindi sa anang mga pumueoyo si Kapitan Nalayog nga magsunod sa tanan nga health safety protocol agud nga indi eon magkalhit pa ro virus.