Una eon sa kustudiya it Altavas Municipal Police Station ro tatlo ka mga magmaeanghod nga suspek sa pagpangbuno-patay sa sangka 57-anyos nga biktima sa Brgy. Linayasan, Altavas ku Mayo 24.
Suno kay PLt. Abelardo Palma Jr., officer in charge it nasambit nga taeatapan, natigayon nga madakpan sa mismong adlaw ag sa mismong brgy. ro sambilog sa mga suspek.
Samtang, ro daywa pang suspek hay natigayon nga mabuoe kahapon nga adlaw, ro sambilog kara hay nadakpan sa Brgy. Catmon sa nasambit man nga banwa, samtang ro sambilog pa hay nabuoe mat-a sa banwa it Banga.
Paathag ni PLt. Palma, samtang naga-tikang ro biktima sa highway hay ginbantayan raya it mga suspetsado. Uwa man sigon it nagtuhaw nga kun ano pang diskusyon nga natuhaw sa magtimbang nga bahin ag insigida nanda rayang ginkabuligan nga bun-on.
Base sa andang inisyal nga pag-imbestiga, nakaangkon it indi magnaba sa napueo ka mga stab wound ro biktima, partikular eon sa likod nga parte it anang eawas nga gintunaan it anang kamatayon.
Dugang pa nana, ro ginatan-aw nga anggulo hay ro pag-angkon it alitan it sambilog sa mga suspect sa biktima.
Sa makaron, pagapasakaan it kasong murder rom ga suspetsyado.
