KALIBO, Aklan—Naeowas it mga tawuhan it Philippine Coast Guard (PCG)-Aklan ag Special Operation Unit ro tatlong mangingisda matapos nga magkaaberya ro ginasakyan nga baroto sa kaeawran nga sakop it Isla it Boracay ag Caluya Island sa probinsiya it Antique.
Suno kay Senior Chief Petty Officer Dominador Salvino, deputy station commander it PCG-Aklan natabu ro nasambit nga insidente bandang alas-4:00 kahapon it aga-aga.
Ginkilaea ro mga nakaeowas nga sanday Artemio Famisan, 46 anyos ; Bernardo Seraspi, 53 anyos; parehong residente it Sitio Hagdan, Barangay Yapak, Boracay ag CJ Labitag, 16 anyos it Sitio Minoro, Barangay Caticlan, Malay, Aklan.
Ginasugid nga pauli eon kunta ro mga mangingisda sakay it FBCA Daniella kat masamaran sanda it makina rason nga nagpundo ro pag-andar it baroto ag nagpa-eutaw-eutaw sanda sa dagat.
Matapos makipag-angot si Ms. Resty Solanoy, insigidang nag-deploy it search and rescue team ro PCG.
Matapos nga maeowas, ginguyod it PCG ro nasamad nga baroto sa reclamation area it Caticlan jetty port sa Malay.
Matapos masigurong una eon sa maayos nga kundisyon ro mga mangingisda, ginpasugtan ro mga raya nga maka-uli.
