Kalibo Aklan ————–Euwas nga nakabalik sa andang panimaeay mga bandang alas-9 kabi-e ro tatlong ka mga mangingisda nga nauna eun nga naireport nga naduea ko adlaw it Biyernes, petsa 8 it Oktobre.
Suno kay PCpl. Aljorin Mendoza it Numancia PNP nga kabi-e eamang kat nagtawag sa andang taeatapan ro sambilog sa pamilya it mga nasambitan nga mangingisda nga si Jessa Visca agud mag-imporma nga una eun sa maayos nga kahimtangan ro mga raya.
Nauna kara, nagpablotter ro andang pamilya matapos nga owa makabalita kanday Rodrigo Flores, 34 anyos, Francis Dave Legarda ,26 anyos ag Chris Predo, 17 anyos nga nauna eun nga nagpaeawod agud nga magpamunit sa kaeawran nga sakop it Masbate.
Ro tatlo hay una eun makarun sa andang tagsa-tagsa ka mga panimaeay sa Barangay Bubog, Numancia.
Samtang sa pihak nga parte, ginpahayag it sambilog sa mga mangingisda nga si Rodrigo Flores nga bangud sa maeain nga paniyempo tuga it Bagyong “Maring” hay nagpagdesisyunan eun lang nanda nga magdungka sa Masbate.
Masuwerte man sigon ag may nagbulig kanda para makakaon.
Kat medyo naghinay eun ro humbak hay nagdesisyon man ro tatlo nga mag-uli sa andang panimaeay.
