KALIBO, Aklan — Kasunod it plano it lokal nga gobyerno it Kalibo nga magpatindog it Community Hospital, ginatun-an nga makaangkon it espasyo kara ro mga iga-rescue nga mentally-challenged persons ukon mga tawo nga may diperensiya sa paminsaron.
Suno kay Carla Suñer Doromal, executive assistant to the mayor it LGU-Kalibo nga tuyo kara nga makaangkon it ilistaran ro mga tawong may diperensiya sa paminsaron ag malikawan nga magwinarang ag makahalit sa andang isigkatawo.
Apang ro nasambit nga plano hay igadangop pa sigon nanda sa Department of Health kamana man nga pagatun-an ro pagaboe-an it nagakaigo nga pondo para kara.
Dugang pa nga masyadong magastos ro pagbiyahe ag pagpabueong sa mga gina-rescue nga mga mentally-challenged persons sa mental health facility sa Metro Manila.
Nasayuran nga sa maabot nga Marso 17, nakataeanang pagadaehon it LGU-Kalibo ro tatlo sa limang mentally-challenged persons nga na-rescue it mga otoridad ko nagtaliwan nga adlaw sa sangka pasilidad sa Metro Manila.
Bangud sa reklamo it pagiging bayolente it pila sa mga raya, ginkasa ro operasyon agud nga mahimos sanda pinaagi sa pagbueuligan it Kalibo Municipal Police Station, Municipal Social Welfare and Development Office (MSWDO) ag iba pang natungdan nga ahensiya it gobyerno .
