Nakalista eon it tatlong gun ban violators umpisa nga ginkasa ro regular COMELEC Checkpoint sa Western Visayas ko Enero 12, 2025.
Raya ro ginpahayag ni P/Lt. Col. Arnel Solis, tagapaghambae it Police Regional Office ukon PRO-6 sa interview it Bombo Radyo Kalibo.
Magapangatubang ro mga raya it kasong pag-eabag sa Republic Act 10591 ukon Comprehensive Firearms and Ammunition Regulation Act, ag Republic Act 7166 ukon COMELEC Gun Ban.
May tig-sambilog nga naaresto halin sa Iloilo City, Bacolod City ag Capiz.
Owa man sigon sanda it namonitor nga mga lugar nga may mainit nga naga-engkwentruhanay bangud sa pulitika.
Ginpaathag pa ni P/Lt. Col. Solis nga ro pagpatuman it Comelec Checkpoints hay kaparte it security protocols agud nga mabaeabagan ro anumang kinagamo sa nagahilapit nga eleksyon .
Magabuhay ro gun ban hasta sa June 12, 2025.
Sa nationwide gun ban, hugut nga ginabawae ro pagdaea it baril it sin-o man nga sibilyan mag-eowas eon lang kon may permit ukon sertipikasyon halin sa Comelec.
Ro mga mga pulis ag soldado eamang ro otorisadong magdaea it baril kaibahan ro dokumento nga nakabutang ro andang pangaean, ranggo ag deployment.
Ro checkpoint inspection suno kana hay ginadumaeahan it mga pulis ag militar ag ginpatuman ro “plain view doctrine”.
Indi kara pwedeng buksan ro saeakyan ukon compartment sa checkpoint.
