KALIBO, Aklan — Padayun nga ginabueong sa Aklan Provincial Hospital ro tatlong katawo matapos nga mag-eab-anay tuga it kahilungon sa Brgy. Bulabod, Malinao, Sabado it gabi-i.
Nakilaea ro mga biktima nga sanday Robert Tiongson, 55, manghud nga si Dolpino, 44 ag andang gumankon nga si Reynold Gregorio, 19, puro mga residente it Brgy. Capataga, Malinao.
Base sa report, matapos nga maka-uli halin sa inuman ro tatlo hay uman nga nagpanghangkat it tagay ro gumankon nga si Reynold matapos nga mabitin.
Sa kahilungon hay gin-kwelyuhan ag ginhana nga gilitan sa leog it gumankon nga si Reynold ro anang tiyo nga si Robert gamit ro sangka espading kasunod it mainitan nga diskusyon.
Nagpatunga si Dolpino matapos nga makita nga duguan ro leog it anang magueang.
Matapos nga owa nagpamati ro gumankon, gin-eabu raya ni Dolpino ag tinamaan sa anang ueo.
Nagbaeos si Reynold rason nga nakaangkon it lastro si Dolpino sa anang waea nga alima.
Nagdesisyon ro tatlo nga indi eon magpasaka it kaso kasunod it insidente.
