NATIONAL News — Bukon eamang it sambilog kundi nga tatlong mga bagyo ag daywang bag-o nga maeain nga paniempo ro ginabantayan makaron sa sueod ag sa guwa it Philippine Area of Responsibility (PAR).
Ro Super Typhoon Yagi ukon si dating Bagyo Enteng hay maga-landfall sa Hainan Island sa Southern China.
Ro Tropical Storm Leepi hay una sa guwa it PAR ukon sa nabagatnan-nasidlangan it Japan.
Ro panibag-o nga bagyo ukon Tropical Depression hay naporma sa guwa it PAR ukon sa nasidlangan it Extreme Northern Luzon.
Ro sangka madamoe nga gae-um sa nasidlangan it Northern Luzon hay una sa sueod it PAR nga posible mangin bag-o nga Low Pressure Area sa masunod nga mga inoras ukon inadlaw ag posible mangin bagyo.
Ro sambilog pa nga madamoe nga gae-um sa Pacific Ocean ukon sa nasidlangan it Mindanao nga una sa guwa it Philippine Area of Responsibility hay posible nga mangin bag-o nga Low Pressure Area ag may posibilidad man nga mangin bagyo sa masunod nga mga inadlaw.
