Ginkumpirma it Department of Migrant Workers (DMW) nga kaibahan ro 3 overseas Filipino workers (OFWs) sa namatay sa nag-eontad nga sunog sa sangka residential building sa Kuwait.
Suno kay Migrant Worker Secretary Hans Leo Cacdac, namatay ro 3 ofws bangud sa smoke inhalation.
Ro mga biktima hay kaibahan sa 11 OFWs nga nagatrabaho sa sangka Kuwaiti construction company nga idto sa edipisyong nasunog.
Suno sa ahensya, nagapabilin nga una sa kritikal nga kondisyon ro 2 OFWs nga idto sa ospital samtang 6 nga iba pa hay eowas eon ag uwa nalastruhan.
Samtang, nakikipag-angot eon man ro mga opisyal it Pilipinas sa tanan nga pamilya ag himata it 11 apektadong OFWs.
Ginmanduan eon man it opisyal ro OWWA ag Migrant Workers Office sa Kuwait nga makipagbuligan sa pagtinguha it Embahada it Pilipinas sa Kuwait para marepatriate ro bangkay it tatlong namatay nga OFWs.
Samtang, ginpasiguro it opisyal nga magatao ro gobyerno it kinahang-eanon nga bulig ag suporta para sa OFWS ag andang mga pamilya sandig sa direktiba it presidente.
