KALIBO, Aklan—Gin-imbitahan it Numancia Municipal Police Station ro tatlong persons of interest sa natabu nga pagpamaril sa sueod it campus it Numancia Integrated School, agahon it Martes, Oktubre 1 sa Brgy. Poblacion, Numancia.
Base sa report, nagsub-eang ro daywang grupo it mga pamatan-on sa handwashing area kat gulping binaril ro sangka 19 anyos nga Alternative Learning System ukon ALS student, residente it Purok 4, Brgy. Bulwang Numancia gamit ro 12-gauge shotgun ukon sumpak it gina-alegar nga 16-anyos nga Grade 11 student nga tumandok it Brgy. Cogon, Lezo.
Matapos ro insidente hay nakadaeagan pa sigon ro biktima ag nagpangayo it bulig nga insigida man nga nadaea sa Aklan Provincial Hospital nga ginasugid nga una sa kritikal nga kondisyon bangud sa naangkon nga igo sa anang eawas.
Nagkanya-kanya man it paeagiw ro mga suspek apang natumod it pulisya pinaagi sa mga testigo nga nakasaksi sa insidente.
Gina-imbestigahan pa it pulisya kon ro insidente hay may kaangtanan sa gang war.
Ginasugid nga pila sa mga suspek hay outsider ag bukon it estudyante sa nasambit nga eskwelahan.
Bangud sa natabu hay napurnada ro selebrasyon it Teachers Day sa nasambit nga eskwelahan kamana man nga nagtuga it kakugmat sa mga ginikanan nga kanya-kanyang nagsueang sa andang mga estudyante.
Sa pihak nga parte, laygay ni Dr. Johan Cawaling, Officer In Charge it DepEd Aklan nga hueaton eon lang ro opisyal nga pahayag it kapulisan .
Apela pa nana sa mga ginikanan nga giyahan ro andang mga unga agud nga indi magtaeang it daean nga paga-agihan.
