KALIBO, Aklan—Matapos nga mataw-an it clearance it Municipal Health Office nga pwede eon nga makabalik sa trabaho ro mga pulis nga naka-deploy sa Police Precint Community 4 sa Barangay Caticlan sa banwa it Malay, nagapameligro nga posibleng magsarado man ro sambilog pa nandang police station sa Barangay Poblacion matapos nga magpositibo sa Coronavirus Disease 2019 ukon COVID-19 ro tatlong pulis.
Raya ro ginpahayag ni Lt. Col. Don Dicksie De Dios, hepe it Malay Police Station sa Bombo Radyo Kalibo.
Madumduman nga gin-lockdown ko nagtaliwan nga Mayo 9, 2021 ro PCP 4 matapos nga pila sa andang mga tawuhan hay nag positibo sa deadly virus kaibahan ro andang hepe.
Nasayuran nga kapin sa 35 pulis ro gin-quarantine matapos nga ma-expose sa andang mga katrabaho.
Gindugang pa ni De Dios nga ginatun-an pa makaron it malay inter agency task force kon iga-lockdown man ro PCP 5 matapos nga daywang pulis ro kumpirmadong nagpositibo sa sakit.
Bangud kara, kapin sa 50 nga iba pang tawuhan it nasambit nga police station ro ginpaidaeum sa swab tests martes it agahon ag insigidang gin quarantine ro mga may posibleng close contact sa mga pasyente.
Makabig sigon nga peligroso ro trabaho it mga kapulisan nga makabig man nga mga frontliners.
