KALIBO, AKLAN — Patay eon kat makaabot sa Romblon Provincial Hospital ro tatlong unga nga mag aeamigu kat maeunod sa Odiongan Bay, Brgy.Tabing-dagat, Odiongan, Romblon.
Gin kilaea ro mga namatay nga sanday Daniel Jacob Teano Taneza, 11; Heaven Aizeh Adel Fababaer, 8, ag Mike David Atilano Panoy, 10, puros mga estudyante ag residente it nasambitang lugar.
Samtang, nakaeowas man si Miguel Llorca Valenzuela, 8, ag padayun nga gina bueong sa makaron sa nasambitan nga ospital.
Base sa imbestigasyon it Odiongan Municipal Police Station, nagsaeampitan sigon ro mag-aeamigo nga maligos.
Apang, owa sigon nasarangan it mga unga ro mabaskog nga baeod dahilan nga inanud sanda sa madaeom nga bahin it baybayon.
Maswerteng nakaeowas ro sambilog sa mga unga ag insigidang nakapangayu it bulig.
Ro mga biktima hay nakita it mga miyembro it Philippine Coast Guard (PCG) Odiongan makataliwan ro daywang oras nga pag inusoy.
