KALIBO, Aklan—Naghana nga magpakamatay pinaagi sa pagbigti ro sangka 30-anyos nga soltero sa sueod it andang baeay sa Brgy. Linabuan Norte, Kalibo.
Suno kay Mrs. Marlyn Magbanua, kaeapit-baeay ag nakasaksi sa insidente nga bandang alas-9:40 kaina it agahon kat makit-an it anang gumankon nga nakabigti sa sueod it andang baeay ro biktima.
Nasayuran nga ro eaeaki hay may gina-angkon nga baeatian nga dystonia ukon movement disorder.
Hereditary sigon ro nasambit nga sakit, kun sa siin daywa pa sa anang igmanghud hay naga-angkon man kara.
Dati sigon raya nga may trabaho, apang kat maangkon ro masakit hay napilitan raya nga magpundo sa anang obra.
Base sa report, nasapwan ro biktima nga nakabitay sa kahoy nga baeayan gamit ro cable wire.
Insigida sanda nga nagpangayo it tabang sa mga kaeapitbaeay ag barangay official agud nga madaea ro biktima sa provincial hospital nga sa mayad nga swerrte hay una eon sa mayad nga kahimtangan.
Samtang, ginpahayag man it ina it biktima nga kahapon hay nagpabati-bati eon kana ro anang unga nga nagaoy eon imaw ag nalisdan sa anang sakit.
Haeos limang dag-on eon sigon nga naga-antus ro biktima sa anang sakit.
