KALIBO, AKLAN — Pormal eon nga nabaton it mga lola ag lolo ukon ro mga gina kabig nga centenarians sa probinsiya it Aklan ro andang insentibo nga naga balor it P100,000 nga cash.
Suno kay Ms. Evangeline Gallega, head it Provincial Social Welfare and Development Office (PSWDO) Aklan nga kabilogan nga 30 ka mga centenarians ukon syen anyos nga naga kabuhi sa kalibotan ro natigayun nga makabaton it grasya maghalin sa Department of Social Welfare and Development (DSWD).
Raya sigon hay bilang pagtuman sa Centenarians Act of 2016 nga naga mandu sa pagtao it nasambit nga benefisyo sa mga Pilipino nga nakaabot sa edad nga syen anyos pataas.
Sa makaron sigon hay 116 nga lola ro pinakamagueang nga naghalin sa banwa it Kalibo ag nakataeana nga maga-selebrar it anang ika-117 years old nga kaadlawan sa maabot nga Mayo 9.
Ro nasambitan sigon nga centenarian ro gina kabig nga pinakamagueang sa makaron sa Region VI.
Apang, paga usisaon sigon nanda ro record sa national agud masayuran ro ibang data.
Samtang, gin laygay man kara sa mga kapamilya it mga centenarians nga magpadueong eamang sa mga natungdan nga munisipyo agud mataw-an it naga kaigong requirements nga kinahangeang kumpletuhon agud ma-avail ro benepisyo.
Nasayurn nga mag eowas sa P100,000 maghalin sa DSWD, dugang nga nagbaton ro mga centenarians it P10,000 maghalin sa provincial government kamana man it dugang nga cash incentives maghalin sa andang natungdan nga munisipyo.
