KALIBO, Aklan—Ginaeauman nga igapatigayun eon ro pagbakuna sa mga tourism workers sa isla it Boracay matapos mag-abot ro kapin sa 3,000 doses it COVID- 19 vaccine nga himo it Sinovac.
Suno kay Malay Mayor Frolibar Bautista ro nasambit nga mga bakuna hay halin sa Department of Tourism (DoT) nga personal nana nga ginbaton ag ginbutang sa andang cold storage facility.
Nauna kara, nagpanawagan ro alkalde it dugang nga supply ir bakuna agud nga maangkon ro herd immunity sa banwa it Malay ag madeklarang euwas nga destinasyon ro Boracay.
Target it DoT nga maturukan it double doses it bakuna ro haeos 40,000 nga tourism workers sa isla.
Raya hay bilang kapare it pagpahaum it gobyerno sa pagbukas it Boracay sa bilog nga kalibutan.
Umpisa Hulyo 1 hasta 4, naga-abot eon sa 1,050 ro tourist arrivals nga kaabuan hay naghalin sa National Capital Region (NCR).
Ko buean it Hunyo, kapin sa 26,354 ro nailistang bakasyunista sa Boracay.
