KALIBO, Aklan—Ginkumpirma ni Dr. Cornelio “Bong” Cuatchon, Jr. it Provincial Health Office ukon PHO-Aklan nga nabaton eon it provincial government ro 3,000 vials ukon masobra sa 15,000 doses it Johnson & Johnson COVID-19 vaccine nga himo it American firm nga Janssen Pharmaceuticals Companies.
Suno kana nga ro kada vial it bakuna hay may sueod nga 5 doses.
Target sigon nga maturukan it nasambit nga single dose nga bakuna ro mga senior citizens ag persons with comorbidities.
Apang owa pa it plano kon hin-uno iga-rolyo ro nasambit nga mga bakuna.
Makataliwan suno kana ro sang domingo hay makabig eon nga fully vaccinated ro sangka indibidwal nga naturukan Johnson and Johnson.
Sa makaron hay nagapadayun ro vaccination program it kada local government units ag provincial government sa ABL sports complex gamit ro bakuna nga himo it gamaleya ukon sputnik V ag astrazeneca.
Ko nagtaliwan nga domingo hay nag-abot ro 1,100 vials ukon 11,000 doses it astrazeneca.
Gindugang pa ni Dr. Cuatchon nga ro target nga mabakunahan nga 18 anyos pataas sa aklan hay naga abot sa 398,877, apang ro nabakunahan pa eamang it 1st dose hay 35,606 samtang ro naka-2nd dose eon hay 20,494 ukon 5.14% nga makabig nga maeayo pa agud nga maabot ro herd immunity.
Raya hay ginaeakipan pa eamang it A1, A2, A3 ag A4 nga priority group apang owa pa sanda naka-umpisa sa A5 nga grupo ukon mga naeakip sa pigadong pamilya.
Samtang, padayun kara nga gin engganyo tanan nga magpakuna bangud nga mabahoe sigon raya nga proteksyon kontra sa deadly virus.
