Kalibo Aklan ————–Ginabana-bana nga kapin sa 30,000 pesos ro kabilugan nga danyos nga nailista matapos nga nasunog ro second floor it sangka 3 storey nga baeay sa Bonifacio Street, Barangay Poblacion, Libacao.
Suno kay SFO2 Ricky Dominggo it BFP-Libacao nga natabo ro insidente nga nagresulta it partially damage sa panimaeay nga ginapanag-iyahan ni Wenifreda Villanueva Zolina mga bandang alas 7:00 ro pang orason kabi-e kung sa siin nagtawag sa andang taeatapan si PSSgt Jhon Bert Zaulda it Libacao PNP agud nga mag-imporma angot sa hitabo.
Sa makarun hay padayun pa nga gina-imbestigahan ro ginhalinan it insidente apang sambilog eun sa ginapanan-aw nga rason hay ro electrical bangud patay-sindi ro suplay it kuryente sa nasambitan nga lugar.
Samtang bandang alas 7:45 ro oras kabi-e hay nacontrol man ro kaeayo ag owa eun nagkalhit pa.
Owa man it may nailistang nasakitan ukon eubos nga naapektuhan sa insidente.
