Kalibo Aklan ——–Arestado ro sangka 31 anyos nga eaeaki sa pagbaligya it illegal nga droga sa ginkasa nga buy-bust operation sa Sitio Libtong, Barangay Estancia, Kalibo.
Sa pagbueuligan it Kalibo Municipal Police Station ag Philippine Drug Enforcement Unit (PDEU), nadakpan ro suspek nga si Jomar Apolinario, sangka construction worker ag naga sideline it pagduso it illegal nga droga ag residente it Brgy. Tisa, Roxas City Capiz.
Nagkasugot sigon ro suspek ag pusher buyer nga magakita sa nasambit nga lugar ag matapos nga magbaeayluhan it illegal nga droga ag 2,000 pesos nga marked money hay insigidang gin-aresto it mga otoridad si Apolinario.
Mag-eowas sa buy-bust money ag sangka sachet it ginadudahan nga shabu, narekober pa halin sa suspek ro dugang nga sangka sachet it droga nga ginsueod sa sangka sanitary napkin nga ginbutang sa sensitibo nga parte it anang eawas ag sangka cellphone .
Sa interview it Bombo Radyo, hugut nana nga ginpamalibaran nga nagaduso ag nagagamit imaw it illegal nga droga .
Suno kana nga first time nana nga nag agto sa Aklan kun sa siin hay ginsueang imaw it anang ginaturo nga igkampod sa sangka terminal it van sa prente it sangka mall agud nga taw-an it obra, apang pag abot sa nasambit nga lugar hay ginbaklid imaw it mga owa nakilaea nga mga kaeaeakin-an nga ko ulihi hay nasayuran nga mga pulis .
Magapangatubang sa kasong pag-eabag sa Comprehensive Dangerous Drugs Act ro nadakpamn nga suspek.
