KALIBO, Aklan—Pagapasakaan it kasong murder ro suspek nga nagbaril-patay sa sangka 31 anyos nga si Ronel John Eliseo ko Huwebes it gabi-i sa Brgy. Caticlan, Malay.
Suno kay P/Corporal John Briones, imbestigador it Malay Police Station nga nasapwan eon lang ro biktima nga naga eutaw eutaw sa tubi sa sangka katangkehan nga may tama it bala sa anang likod ag ueo halin sa shotgun.
Natigayon eon man sigon nanda nga maaresto ro suspek nga nakilaea kay Darry Intinado, 35 anyos ag caretaker it nasambit nga fish pond.
Raya hay pinaagi sa bulig it mga testigo nga nakasaksi sa krimen.
Posible sigon nga nag-trespaasing sa lugar ro biktima kaibahan ro ap-at nga iba pa agud nga magabo-oe kunta it paon sa andang pagpangisda.
Apang nakita sanda it suspek ag insigidag ginpaeukpan , kun sa siin sa owa it swerte hay tinamaan ro biktima.
Nauna eon nga nag report sa kapulisan ro kaibahan it biktima agud nga i-report nga missing ro sambilog nanda nga kaibahan.
Pagka-aga , Disyembre 11 hay nasayuran nanda nga nasapwan raya nga patay eon sa nasambit nga lugar.
Insigidang gin aresto ro suspek, apang hugut kara nga ginpamalibaran nga imaw ro sa likod it krimen.
