KALIBO, Aklan — Nagapangatubang sa kasong parricide ro 31-anyos nga laborer matapos nga mapatay ro kaugalingong ama sa sueod it andang baeay sa Barangay Candelaria, New Washington, Aklan.
Suno sa pulisya, namatay ro biktimang ginkilaeang si Haide Prado, 69, sangka mangunguma ag residente it nasambitang lugar matapos nga igapos it onga ro mga alima ag siki kara gamit ro plastic rattan samtang nagakatueog antes nga ginbusaean ro anang ba-ba.
Ginpahapa sigon nana raya sa mahaea ag gindum-ok ro ueo agud nga inde makaginhawa hasta sa mautdan it ginhawa.
Insigida man nga nagsurender sa mga otoridad ro suspek nga si Ger Prado.
Sa interview it Bombo Radyo, ginpahayag it onga nga sa kada mahilong ag makaangkon sanda it mainitang diskusyon, nagabalik sigon sa anang paino-ino ro ka-istrikto it ama kat imaw hay onga pa eamang kamana man ro pagpanakit kara sa andang ina.
Aminado man ro suspek nga kaparehas it anang ama, imaw hay paeahilong man.
Raya eon sigon ro pangaywang kahigayunan nga ginhana kara nga patyon ro ama.
Nagahinoesoe man sigon imaw sa anang nahimo ag haom nga atubadngon ro penalidad.
