KALIBO, Aklan—Naangkon eon it 31 ka mga benepisyaryo ro legalidad sa eogta nga ginaistaran sa isla it Boracay.
Raya hay kasunod sa ginpatigayon nga Certificate of Land Ownership Award (CLOA) distribution it Department of Agrarian Reform (DAR) Aklan kaibahan ro Boracay Inter Agency Task Force (BIATF) ag lokal nga gobyerno it Malay sa Boracay Tumandok Agrarian Reform Beneficiaries Association.
Suno kay Ernesto Anino it DAR Aklan nga ko una hay naging tensyonado ro pag-award it 1.98 hectares nga eogta sa mga benepisyaryo bangud nga ro nasambit nga eogta hay gwardyado ag may kurae.
Apang ko ulihi hay naging madinaeag-on man ro andang pagsueod sa propyedad sa bulig it law enforcement agency.
Mag-eowas kara, nagdonar man it kantidad sa 31 families ro tag-iya it sangka mabahoe nga hotel sa Boracay agud nga ipatindog it andang baeay sa nasambit nga lugar.
Madumduman nga ko Marso 12 pa kunta iga-award sa mga tumandok ro nasambit nga eogta ag mismong si Pangueong Rodrigo Duterte ro maga-award sa mga raya apang uwa nadayon bangud sa pag-eopok it pandemya.
Ko November 8, 2018, nagpanupod man si Duterte it CLOA kon sa siin pila sa mga nataw-an kara hay ro mga katutubo nga miyembro it Boracay Ati Tribal Organization (BATO).
