Kalibo Aklan ——-Patay eon kat nasapwan it anang live-in partner ro sangka 32-anyos nga ginang matapos nga nagdesisyon raya nga utason ro anang kabuhi sa Brgy. Pusiw, Numancia.
Suno kay PSSgt. Christine Ruado it Numancia PNP, naabutan it 30-anyos nga eaeaki ro anang live in partner nga patay eon bangud nga uwa man raya it kaibahan sa andang baeay.
Sa trabaho sigon ro nasambit nga eaeaki kat matabo ro insidente.
Ginpahayag dugang nga uwa man sigon it masugid nga rason ro eaeaki sa naging kamatayon it anang partner.
Nauna eon nga ginpaathag sa Bombo Radyo Kalibo ni Dr. Jeanette Ortega, sangka Psychiatrist ag Mental Health Advocate nga makabulig it mabahoe sa mga nagaexperiensiya it depresyon ro pakikipag-istorya sa ibang tawo, pag-angkon it recreational activities, healthy ag positive lifestyle, ag eabaw sa tanan ro support group halin sa mga masaligan nga amigo ag atensyon it pamilya.
Indi sigon makabulig sa pagsolbar it problema ro aeak ukon illegal nga droga.
Makabulig man suno kana sa paglikaw sa depression ro pag-exercise bangud nga ginapaguwa kara ro mga endorphins ukon ro “joy hormones”.
Samtang para sa mga tawo nga nakaexperiensiya it depresyon, pwedeng magtawag sa Hopeline it DOH sa numero (02) 804-4673 ag 0917-5584673 para sa counselling ag iba pang impormasyon.
