KALIBO, Aklan — Haeos indi mai-explikar it sangka 33-anyos nga ina ro anang kalipay matapos nga madinaeag-on nga nakatapos sa kolehiyo sa kursong
Bachelor of Education major in T.L.E makaron nga dag-on.
Ginpakigbahin ni Melody Grace Arcilla sa Good Morning Philippines Program it Bombo Radyo Kalibo ro anang nangin experiensiya antes na naabot ro anang handum nga makatapos sa anang gusto nga kurso.
Owa sigon naging upang para kana ro anang edad agod nga makatapos sa pag-eskwela.
Gin-istorya kara nga sa bata pa imaw hay nailo eon imaw sa ginikanan.
Sa edad nga 18-anyos hay nag-asawa eon imaw kung siin nangin maswerte man imaw sa anang nangin asawa.
Ginpahayag man kara, nga nareyalisar na sigon nga mas kinahang-ean na nga makatapak sa kolehiyo ag makatapos it kurso.
Bangod kara, apisar nga may daywa eon imaw ka mga unga hay nagtinguha imaw nga magpadayun sa pagtuon.
Naka-umpisa eon sigon imaw it anang first year ku dag-on 2009 apang bangod sa indi malikawan nga maka-angkon it mga problema sa kabuhi hay nagdesisyon imaw nga magpundo.
Tuga man it hugot nga suporta it anang asawa, ag sa kagustuhan na nga mangin manami nga ihimplo sa anang mga inunga, nagpadayun imaw sa pagtuon ag nagtinguha nga makatapos.
Ginpahayag dugang ni Arcilla nga owa nangin madali para kana nga hueayon ro anang oras sa pagiging ina ag pagiging estudyante.
Apang, owa gid imaw nadueaan it pag-eaum ag nagpursige sa gihapon.
Owa man kara ginapinsara ro mga ginahambae it ibang tawo sa palibot bangod ro prayoridad kara hay ro makatapos ag maka-angkon it manami nga trabaho para sa anang pamilya.
Sa pihak nga parte, ginpahayag ni Melody nga indi pagpa-eampason ro mga opurtunidad nga naga-abot sa kabuhi.
Owa sigon sa edad ro pag-eskwela kundi nakadepende raya sa pagpursige ag pagtinguha sa kabuhi.
