KALIBO, Aklan—Sumaka pa sa kabilugang 1,559 ro kabilugan nga kaso it Coronavirus Disease 2019 ukon COVID-19 nga nailista sa probinsya it Aklan umpisa nga magtuhaw ro pandemya.
Raya hay matapos nga makalista it 33 nga panibag-ong kumpirmadong kaso it COVID-19 infection ro Provincial Health Office (PHO)-Aklan makaron nga adlaw it Miyerkules, Abril 28.
Sa nasambit nga numero, 17 ro maghalin sa banwa it Kalibo, waeo sa Malay, tatlo sa Ibajay kamana man nga tig daywang kaso sa Altavas ag New Washington ag sambilog sa Batan.
Sa pihak nga parte, may 7 man nga bag-ong nagmayad sa sakit rason nga humampak eon 1,355 ro total recoveries.
Sa makaron, 166 pa ro aktibong kaso it deadly virus sa probinsya.
151 kara ro naka-facility quarantined ag 15 ro admitted sa COVID ward it Aklan Provincial Hospital.
Samtang, nagapabilin nga 38 ro namatay matapos nga dapuan it makamaeatay nga sakit.
