KALIBO, Aklan — Kabilugan nga 34 nga grupo ag tribu ro magapasakop sa 2025 Kalibo Sadsad Ati-Atihan contest.
Suno kay Boy Ryan Zabal, Kalibo Sadsad Ati-Atihan contest committee, sa nasambit nga numero 16 kara hay naghalin sa banwa it Kalibo samtang ro 18 nga iba pa hay naghalin sa ibang banwa kapareho it Makato, Ibajay, Malinao, Numancia ag Lezo.
Ko nagtaliwan suno kana nga Agosto 9 hay nagtapos eon ro andang registration para sa contest.
Ginpasiguro man ni Zabal nga mas magiging bongga ag makolor pa gid ro selebrasyon kara sa Enero 2025 kun sa siin pagadepensahan it Black Beauty Boys halin sa Linabuan Norte Kalibo ro anang titulo sa Tribal Big category.
Kapin suno kana sa P2.8 milyon ro subsidies nga ginpaguwa halin sa festival organizer nga Kalibo Ati-Atihan Festival Board (KAFEB) nga kun sa siin ro katunga hay nakataeana nanda nga igapaguwa ag ro nabilin nga 50% hay igatau it LGU-Kalibo ag KAFEB sa buean it Nobyembre.
Dugang pa ni Zabal nga kapin sa P840,000 ro subsidy para sa mga contingents sa Tribal Big category, P810,000 para sa Tribal Small, P770,000 sa Modern Group ag P420,000 para sa Balik Ati category.
Ro contest hay pagahiwaton sa bisperas it kapiestahan sa Enero 18, 2025, Sabado nga adlaw. via Aklan Forum
