KALIBO, Aklan–Arestado ro sangka 35-anyos nga eaeaki matapos ro ginpatigayun nga drug buy-bust operation it mga operatiba sa sangka boarding house kaina it hapon sa Ureta Road, Brgy. Andagao, Kalibo.
Ro operasyon hay ginkasa it gintingub nga pwersa it Philippine Drug Enforcement Agency (PDEA), Provincial Drug Enforcement Unit (PDEU) ag Kalibo Municipal Police Station kung siin madinaeag-on nga naaresto ro suspek nga si Byron Roberto sa sueod it mismong kwarto it anang boarding house.
Narekober sa posisyon ag kontrol it suspek ro sangka mabahoe nga sachet it ginapatihan nga shabu kabaylo it kapin sa P9,000 nga marked money nga ginakaeakipan it pilang pekeng kwartang papel.
Ginpahayag ni Police Lieutenant Colonel Frenzy Andrade, Team leader it PDEU-Aklan nga namonitor nanda si Roberto bangud pila sa anang nabaligyaan it droga hay nadakpan sa mga nauna eon nga operasyon.
Nasayuran nga naga-trabaho ro suspek sa sangka restaurant sa isla it Boracay ag kaeabanan nga naga-adto sa banwa it Kalibo kung may naga-order kana it droga.
Ro suspek hay temporaryong nakakulong sa lockup cell it Kalibo Municipal Police Station.
