KALIBO, Aklan—Bangud sa kahilungon, sangka eaeaki gin-eabo ro kainuman sa bahin it Brgy. Daja Norte, Banga.
Nag-angkon it lastro sa waea nga siki ro biktimang si Jomar Nama, 35-anyos, residete it Brgy. Singay sa banwa it Madalag matapos imaw nga maeab-an it suspek ag mismong kainuman nga si Jeoffrey Montuya, sa legal nga edad, residente it nasambitang lugar.
Base sa imbestigasyon it Banga PNP, parehong una sa idaeom it makahieilong nga ilimnon ro daywa kahapon kat matabo ro insidente matapos sandang mag-inom sa sangka baraka sa lugar.
Angot kara, kat maubos eon sigon ro aeak nga andang gina-inum hay parehong nagdesidir ro magtimbang nga parte nga mag-uli eon.
Samtang sa daean sakay it tagsa ka motorsiklo hay gulpi eamang sigon nga nagpundo ro suspek ag nagabot it sanduko ag insigidang gin-eabo sa biktima.
Rason nga nalastrohan raya sa anang waea nga siki.
Ginapahayag nga owa man it dating naging alitan ro magtimbang nga parte ag ginapatihan nga nakursunadahan eamang ro biktima.
Ro insidente hay ginpakamayad lang nga ginparecord sa Banga Police Station para sa nagakaigo nga disposisyon.
