Kalibo Aklan————-35 nga mangingisda sakay it ap-at nga mga baroto ro gin-aresto it PNP Maritime Group sa probinsiya it Aklan bangud sa pag-eabag sa Section 95 it Republic Act 10654 ukon bukon it awtorisadong pagpangisda sa kaeawran nga sakop it banwa it Nabas .
Suno kay P/Master Sergeant Jose Rey Lopez it Aklan Maritime Police nga sunud-sunod nanda nga nadakpan samtang nagapatigayon it seaborne patrol operation kaibahan ro 2nd Aklan PMFC ro mga fishing boats nga FB JOHN MIKAY nga may sakay nga waeong mangingisda; FB LADY PEARL nga may sakay nga 8 man nga crew; FB ST. GEORGE nga may 11 nga mangingisda ag FB JUN & CATHY 2 nga may waeo nga crew.
Ro mga naaresto hay mga residente it Antique, Sambiray, Malay ag Nabas.
Pare-pareho sigon nga kaso ro andang ginpasaka sa mga raya pinaagi sa regular filing sa Aklan Prosecutors Office matapos nga owa nakahingabot sa gintaeana nga oras it inquest proceeding.
Nadakpan sigon nanda nga nagapangisda ro mga raya sa 12.29 kilometres halin sa bibi it baybayon it Brgy. Nagustan, Nabas sa pihak nga mabahoe nga fishing boat ro andang daea .
Ro mga commercial fishing suno kana hay dapat nga magpatigayon it aktibidad nga eampas sa 15 kilometers halin sa bibi it baybay.
Samtang, gindugang pa ni Lopez nga bangud nga regular filing hay gin-release man ro mga mangingisda kaibahan ro andang mga baroto .
Ginpahayag pa nga mas pa nanda nga ginpabaskog ro andang anti-illegal fishing campaign sa mga kaeawran it Aklan agud nga eubusan nga matapna ag maduea eon ro illegal nga pagpangisda kamana man nga maprotektahan ag mapreserba ro mga yamang dagat ag mapasabat ag mapenahan ro sin-o man nga maga-eabag angot kara.
