KALIBO, Aklan — Kabilugan nga 37 nga indibidwal ro nadakpan bangud sa pag-eabag sa ginpatuman nga limang buean nga election gun ban .
Ginpahayag ni Police Corporal Jane Vega, tagapaghambae it Aklan Police Provincial Office (APPO) nga 12 nga firearms ro natigayon nga makumpiska sa sueod it election gun ban period nga nag-umpisa ko Enero 10 ag nagtapos ko Hunyo 12.
Mag-eowas kara, kabilugan nga 25 nga iba pang deadly weapons ro nakumpiska sa nasambit nga period .
Gindugang pa ni Vega nga sa nasambit man nga tiempo hay nakapatigayon sanda it an-um nga Oplan Sita ag Oplan Galugad, 27 nga police response, pito nga checkpoint, tig-sambilog nga illegal gambling ag buy-bust operation.
Ginpaathag ni Vega nga ginabawae sa Omnibus Election Code ro paghupot ukon pag-transport it armas sa guwa it panimaeay ukon lugar it ginatrabahunan sa sueod it election period .
Sakop man suno kana it ban ro iba pang pampublikong lugar ag pribado ag pampasaherong saeakyan.
Sa pihak kara, pangkabilugan nga naging maayos ag matawhay ro ginpatigayon nga mid-term elections sa probinsiya it Aklan.
