KALIBO, Aklan — Kulong makaron sa Aklan Rehabilitation Center (ARC) ro sangka 31-anyos nga eaeaki matapos pasakaan it kasong rape through sexual assault kat maaktuhang ginmolestya kara ro sangka ap-at nga dag-ong ongang babaye sa Barangay Poblacion, Batan, Aklan.
Suno kay PO3 Rachel Miral it Women and Children’s Protection Desk (WCPD) it Batan Police Station nga bandang alas-6:00 it gabi-e kat matabo ro pang-abuso matapos nga aywanan it anang ina ro onga kaibahan ro magueang kara nga eaeaki sa baeay it andang tiya agud nga magsag-ob it tubi.
Sa anang pagbalik hay uwa eon ro anang ongang babaye sa baeay rason nga insigida nana raya nga gin-usoy.
Nasapwan ro onga nga nagapanangison sa kilid it palaisdaan kaibahan ro suspek.
Gilayon nga nagpaeagyo ro suspek, apang naaresto sa ginpatigayong follow-up operation it mga otoridad.
Nagguwa sa medico legal examination nga positibong nahueag ro biktima.
Nasayuran nga ro suspek hay problema sa andang barangay bangud nagagulo kon hilong.
