Mainit nga gina istoryahan makaron it Malaysian netizens ro angot sa mag-asawa nga gin-regaluhan it Mercedez Benz ro andang 4-nga dag-on nga unga nga babaye agud nga ganahan raya nga magsueod sa eskwelahan.
Ko nagtaliwan nga domingo, nag-post sa TikTok it sangka video ro businesswoman nga si Farhana Zahra kun sa siin hay makitang ginakutana kara ro anang unga nga si Fatima kun anong regalo ro anang gusto para sa nagahilapit nga kaadlawan.
Ro sabat ni Fatima sa anang ina hay gusto nana it green Mercedes G Wagon ukon BMW.
Sa nasambit man nga video makita nga nagapromisa si Fatima nga magasueod raya sa eskwelahan kabaylo it anang ginapangayo nga saeakyan.
Suno sa sangka social media post ni Farhana, gin istorya kara nga nabudlayan eon sanda nga mag-asawa nga kumbinsihon ro ap-at nga dag-on nga si Fatima nga maga-umpisa eon nga magsueod sa school bangud nga madali eon lang raya nga maga-limang dag-on.
Sa masunod nga TikTok post ni Farhana, makita nga naka-blindfold ro mga mata ni Fatima para sorpresahon raya sa regalong green nga Mercedes G Wagon nga nakabutang sa sangka transparent nga kahon.
Tunga ro reaksiyon it mga netizens sa mga nasambit nga TikTok videos, may pila nga ginadayaw ro pagiging galante it mga ginikanan agud eamang nga makumbinsi ro unga nga magsueod sa school samtang ro iba man hay ginabatikos ro mga raya bangud nga indi man masarangan nga gamiton it sangka unga ro SUV.
