Nagapati si Atty. Harry Sucgang, sangka political analyst sa Aklan nga sambilog sa mga praktikal nga tikang agud nga makatipid sa tunga it nagatinaas nga presyo it produktong petrolyo hay ro pagpatuman it 4-day work week sa mga taeatapan it gobyerno.
Suno kana nga bangud sa malisod nga sitwasyon, dapat nga mag-usoy it mga pamaagi agud nga mapahagan-hagan ro gastos bukon eamang ro gobyerno kundi pati man ro publiko.
Makaeoeo-oy sigon ro mga pobre nga nasyon sa ginlunsar nga giyera it Amerika ag Israel kontra sa Iran bangud sa kakueangan it reserbang langis.
Ginpaathag nana nga owa man it masyadong gina-obra ro mga empleyado sa gobyerno rason nga bagay kanda nga makaangkon eamang it ap-at nga adlaw ag extended nga napueong oras nga sueod sa trabaho.
Pinaagi kara hay mabawasan ro andang gastos sa pamasahe ag konsumo sa gasolina kamana man nga makatipid sa kuryente.
Sa pihak kara, kinahangean nga masiguro suno kana nga indi raya maka apekto sa sweldo ag benepisyo it mga trabahador.
