KALIBO, Aklan—Madinaeag-on nga naka-eupad sa kahawaan ro ap-at ka mga sibilyan halin sa Estados Unidos.
Ginaeakipan ro mga raya it bilyonaryo ag entrepreneur nga si Jared Isaacman kaibahan sanday Sian Proctor, cancer survivor nga si Hayley Arceneaux nga sangka physician’s assistant sa St. Jude ag Christopher Sembroski.
Suno kay Bombo International Correspondent Greg Aguilar nga ro bilyonaryong si Jared ro nagbayad it $250 million para sa andang pagbyahe sa kahawaan.
Gingamit sigon it SpaceX ro andang dragon space craft nga para sa mga astronaut nga naga-eupad sa International Space Station kung siin sa kauna-unahang kahigayunan hay ginpagamit nanda raya sa mga sibilyan.
Tuyo sigon it ap-at ka mga sibilyan nga mag-explore sa ginasugid nga space tourism.
Nahimo man nanda nga mag-orbit sa bilog nga kalibutan it kapin sa 72 oras ukon sa sueod it tatlong adlaw.
Ro makasaysayan nga all-civilian SpaceX mission hay ginlunsar ko Setyembre 15 ag madinaeag-on nga natapos ko adlaw it Sabado, Setyembre 18.
