Kalibo Aklan————Ap-at eon nga katawo ro patay samtang masobra sa 100 nga iba pa ro naninahan matapos nga tumama ro magnitude 7.3 nga linog sa Japan miyerkules it gabi-i .
Suno kay Bombo International Correspondent Johnny Sato Gallos it Japan nga sa pihak kara, madasig ro recovery it Japan .
Mag-eowas nga haum ro gobyerno ag mga pumueuyu sa mga mabaskog nga linog , madasig man ro pagresponde it mga natungdan nga ahensiya it gobyerno.
Todo bantay man sigon ro mga otoridad bangud nga ro linog hay tumama sa kaeawran it Fukushima kun sa siin nahamtang ro mga nuclear power plant it Japan .
Base suno kana sa balita nga owa it naging kahalitan makaron sa Fukushima Nuclear Power Plant nga nasamad ko 2011 bangud sa tsunami.
Ro sunod-sunod nga linog suno kana hay nabatyagan man sa mabahoe nga parte it japan kaibahan eon ro Tokyo.
Madumduman nga onse anyos eon ro nagtaliwan hay tumama man ro magnitude 9.0 nga linog nga nagtuga it tsunami ag ginkamatay it linibo nga katawo.
Ginaeauman pa sigon makaron ro mga mabaskog nga aftershocks hasta sa masunod nga mga inadlaw .
