KALIBO, Aklan — Kulong ro sangka eaeaki matapos maaresto sa ginpatigayon nga search warrant operation kontra sa loose firearms it mga operatiba it Numancia Municipal Police Station bandang alas-6:00 it agahon it Biyernes, Abril 11, 2025 sa Purok 6, Brgy. Bulwang, Numancia.
Ro suspek hay nakilaeang si alyas Resty, sa legal nga edad, may asawa , sangka tricycle driver ag naga-sideline bilang pintor ag residente it nasambit nga lugar.
Naaresto imaw sa gahum it search warrant para sa pag-eabag sa kasong RA 10591 ukon Comprehensive Firearms and Ammunition Regulation Act.
Suno kay P/Capt Conrado Espino, acting chief of police it Numancia MPS nga gin-aresto ro nasambit nga suspek matapos nga maisirbi ro search warrant ag nabo-oe sa anang posisyon ro mga ebidensya nga ginaeakipan it sangka unit it caliber .22 nga baril; sangka caliber .38; sangka caliber .45 nga puro mga kargado it bala ag sangka home made shot gun.
Puro undocumented sigon ro nasambit nga mga baril, apang ro iba nga may mga serial number hay paga-usisaon nanda kon sin-o ro mga matuod nga nagapanag-iya.
Ginasugid nga maskin nga gina alegar nga pirme raya nga nagapinaeupok it baril sa andang lugar apang owa it sin-o man nga kaeapitbaeay nana ro nakaaangkon it kabaskog it buot nga magpa-blotter sa kapulisan.
Umpisa Disyembre it nagtaliwan nga dag-on hasta makaron nga Abril ro pag surveillance nanda sa suspek.
Ro ginpatigayon nga operasyon, pag-imbentaryo ag pagmarka sa mga nabo-oe nga ebidensya hay nasaksihan it opisyales it barangay.
Sa makaron ro mga natipon nga ebidensiya kaibahan ro suspek hay sa paghinakop it Numancia MPS para sa nagakaigo nga pagdokumento ag disposisyon.
