KALIBO, Aklan —- Gin-aresto ro ap-at nga magka-barkada sa katung-anan it andang inuman bangud sa pag-eabag sa election liquor ban nga ginapatuman it Comelec sa Barangay Balabag sa Isla it Boracay, gabi-i it Domingo.
Nakilaea ro mga suspek nga sanday Wenceslao Flores, Faustino Mangibin, Royulo Aguilar ag Rusty Castillo, puro mga residente it nasambit nga lugar.
Suno kay P/Staff Sergeant Jane Vega, tagapaghambae it Aklan Police Provincial Office (APPO), base sa report nga ginpadaea ni P/Lt. Col. Don Dicksie de Dios, hepe it Malay Municipal Police Station, ro mga suspek hay nadakpan sa aktong naga-inuman sa pampublikong lugar it mga nagapatrolyang tawuhan it Malay PNP.
Nasayuran nga pilang mga tourism establishments sa isla ro nag-apply it exemptions sa liquor ban para sa andang mga bisita.
Ro mga nadakpan hay presenteng nakakulong sa lock-up cell it Malay PNP ag nakataeanang pagapasakaan it kasong pageabag sa liquor ban in relation to the Omnibus Election Code angot sa May 9, 2022 National and Local Election.
