Una eon sa establi nga kondisyon ro ap-at nga naninahan nga persons deprived of liberty ukon PDLs matapos ro natabu nga rambol sa Bureau of Jail Management and Penology (BJMP)-Aklan, agahon it Sabado.
Suno kay Jail Senior Inspector Woody Palmejar, chief operation it Regional Office 6, natabu ro insidente bandang alas-6:30 it agahon samtang nagapahaum ro mga preso sa pag-eaha it andang pamahaw.
Insigida sigon nga rumesponde ro mga naka-duty nga jail guards agud nga mapakalma ro sitwasyon.// Matapos makontrol ro kinagamo, ap-at nga PDL ro nag-angkon it lastro sa nagkaeain-eain nga parte it eawas gamit ro gina alegar nga improvised weapon nga ginpataeum nga kutsara.
Tatlo sa mga biktima hay padayun nga ginabueong sa Aklan Provincial Hospital samtang ro sambilog hay ginsaylo sa sangka pribadong ospital.
Samtang, ro daywang suspek sa insidente hay temporaryong ginbutang sa isolation cell. Uwa pa ginpaguwa it mga awtoridad ro rason it rambol.
Sa pihak kara, ginmandu eon it regional director ro pagpatigayon it maid-id nga imbestigasyon.
Sa pihak nga parte, amat-amat eon sigon nga naibalik sa normal ro sitwasyon sa sueod it pasilidad matapos istoryahon ro mga representative it kada selda kamana man sa bulig it koordinasyon sa kapulisan ag pagpatuman it hugut nga seguridad.
Ginpasiguro man ni Palmejar nga magapadayun ro ginahimo nga mga surprised Greyhound Operations agud nga makumpiska ro mga kontrabando sa sueod it mga selda.
