Umabot eon sa 37 ro numero it mga namatay sa pag-eogdang it M/V Trisha Kerstin 3 matapos marekober ro ap-at pang bangkay sa kaeawran it Hadji Muhtamad, Basilan.
Padayon ro search and rescue operations it Philippine Coast Guard samtang ginausisa ro mga report nga posibleng mas maabo pa ro aktuwal nga sakay it barko kaysa sa nakabaehag sa passenger manifest.
10 pasahero ro nagapabilin nga missing.
Samtang, siyam sa 11 bangkay nga narekober ko adlaw it Huwebes, Enero 29, ro nakilaea eon it andang mga himata.
Ro mga biktima hay halin sa Zamboanga City ag Sulu, kaibahan ro sangka senior citizen ag sangka an-om nga dag-on nga onga.
Madumduman nga ro barko hay nag-eogdang ko Enero 26 samtang paadto it Jolo, Sulu halin sa Zamboanga City.
Sa pihaka kara, ginmando it Department of Transportation ro temporaryong pagpapundo sa mga barko it Aleson Shipping Lines samtang nagapadayon ro imbestigasyon.
