Kalibo Aklan ——–Ap-at nga personnel it Municipal Health Office (MHO) Banga ag ap-at nga pulis man it Banga Police Station ro presenteng ginapaidaeum sa daywang domingo nga quarantine ag Reverse Transcription Polymerase Chain Reaction (RT-PCR) test.
Raya ro ginkumpirma ni Maria Donnalyn Siyambio it MHO Banga.
Suno kana nga mismong ro eaeaki nga Overseas Filipino Worker (OFW) nga residente it Banga nga magabalik eon kunta sa Middle East ro nag-inform kanda nga nagpositibo imaw sa coronavirus .
Ko hulyo 9 hay nag-agto ro pasyente sa andang taeatapan ag sa estasyon it pulisya agud nga mag-asikaso it mga kinahangeanon nga papeles.
Nagbiyahe imaw pinaagi sa Kalibo International Airport ko Hulyo 12 ag ginpaidaeum sa RT-PCR test sa sangka pribadong ospital sa Manila ko Hulyo 17 para sa anang pre-employment departure exam.
Ag ko Hulyo 20 hay nagguwa ro anang test result nga imaw hay positibo sa makamaeatay nga sakit .
Gindugang pa ni Siyambio nga maskin ro pamilya it pasyente hay gin-quarantine ag ginboe-an it swab sample .
Asymptomatic man sigon ro pasyente ag nagatinir makaron sa facility quarantine.
Gindesisyunan man sigon it pamunuan it MHO Banga nga indi i-lockdown ro andang taeatapan bangud nga nakaplastar eon ro precautionary measures.
