KALIBO, Aklan — Ap-at ro totally burned ag 2 ro partially damaged nga baeay ag establisimento komersiyal bandang ala-1:00 kaina it aga-aga sa Brgy. Camaligan, Batan sa prente it sangka eskwelahan.
Suno kay Barangay Captain Rolly Sucgang nga nabugtaw ro mga residente sa lugar nga mabahoe eon ro kaeayo.
Suno kana nga masyadong sunog ro ap-at nga baraka samtang naabo man it kaeayo ro portion it sangka water refilling station ag sangka carinderia.
Nasayuran nga gina-istaran it mga negosyante ro ibabaw samtang sa andang ubos ro andang baraka.
Gindugang pa ni Kapitan Sucgang nga ro sunog hay nag-umpisa sa baealigyaan it kakanin ni Anabelle Ricaforte ag madasig nga nagkalhit ro sunog sa mga kaiping nga establisimento bangud sa mabaskog nga hangin.
Puro himo eamang sa light materials ro mga establisimento rason nga insigidang nagkalhit ro kaeayo.
Nakaguwa man eagi ro mga nagakatueog nga residente rason nga owa it nailistang naninahan.
Nagapati si Kapitan Sucgang nga posibleng bangud sa napabay-an nga kaeayo sa dapog sa pag-eaha it kakanin ro kabangdanan it sunog .
Nagresponde sa sunog ro mga katapo it Bureau of Fire Protection (BFP) Balete ag Altavas.
