KALIBO, Aklan – – – Kasong pag eabag sa Republic Act No. 7787 ukon An Act Declaring Sexual Harassment Unlawful in the Employment, Education or Training Environment and for Other Purposes ro gina pangatubang it sangka 41 anyos nga eaeaki matapos nga gin masahe sa dughan ro anang 25 anyos nga empleyada.
Suno kay SPO2 Babylyn Daylusan it Numancia PNP Station nga natabo ro insidente ku nagtaliwan nga Disyembre 7 it udtro adlaw matapos nga ro suspect ag ro daeaga eamang ro nabilin sa andang opisina.
Gina sugid nga gin taw-an kara it chocolate ro daeaga kamana man it tinapay ag mani.
Samtang naga type sa computer hay gin paeapitan kara ro babaye ag gin muno ro anang rashes sa tangkugo nga tuga it anang allergy.
Gin hambaean sigon kara ro biktima nga owa imaw naila nga magmasakit ro anang empleyado rason nga gin butangan kara it liniment ro anang allergy.
Apang, gulpi eamang sigon nga gin masahe it suspect ro dughan it babaye ag gin bira ro anang nipple nga nagresulta agud mag react raya.
Insigida sigon nga nag usoy it alibi ro biktima hasta sa makauli sa anda.
Naga panangison suno kana nga naga panugiron raya sa anang magueang hasta sa nagdangop sanda sa Numancia PNP Station.
Insigida sigon nga nagpatigayon it operasyon ro kapulisan ag natigayun nga ma-intercept ro suspect sa national highway it nasambitan nga banwa.
Nasayuran nga na-inquest ro suspect apang, natigayun nga makapiyansa it 12,000 pesos para sa anang temporaryong kahilwayan.
